ნაშრომში ის ორგინალური თეორიაა მოცემული, რაც უმოკლეს დროში სახელმწიფოს შექმნასა და ღირსეული ადამიანის საკადრისი ცხოვრების დამკვიდრებას შეგვაძლებინებს. ეს ნაშრომი იმ მკითხველისთვისაა შექმნილი, რომელსაც სიცოცხლის სიყვარული და ბრძოლის უნარი ჯერ კიდევ შემორჩა. 

 
წინამდებარე წიგნის გაცნობის შემდეგ თქვენში მოხდება სასწაულებრივი გარდასახვა - საქართველოს დღევანდელი მკაცრი სინამდვილე სულ სხვა შინაარსით წარმოგიდგებათ. უმძიმესი, “ფატალურად გარდაუვალი” სიტუაციის გამომწვევი მიზეზები თურმე საკმაოდ კარგად ექვემდებარება სისტემური ანალიზის მეთოდებს და ნათლად იკვეთება მისგან თავდაღწევის რეალური გზები. ადამიანის ყოველდღიური, კრახთან შეგუებული მსოფლმხედველობა მოულოდნელად ინგრევა; მის ადგილს იკავებს დიდი რწმენა, ქვეყნის შველის ძლიერი იმედი, რეალურად ქმედების სურვილი. დროებითი დაბნეულობისა და ხანგრძლივი უმოქმედობის შედეგად ჩახერგილი გვირაბის ბოლოდან ხსნის სხივი შემოანათებს და ადამიანის სულში უსაშველობის სტერეოტიპული “გისოსები” დაიმსხვრევა. მეცნიერის ხედვით დამზერილ მიზეზთა მახვილგონივრული, ზუსტი ანალიზით მიღებული უზოგადესი დასკვნებიდან კონკრეტულ, სადღეისო სასიცოცხლო ამოცანების გადაწყვეტისაკენ - აი, წიგნის მთავარი ვექტორის სვლაგეზი! და იგი იწვევს გადატრიალებას ჩვენს შემეცნებაში, იმის ღრმა რწმენას, რაც დღეს ძნელადდასაჯერებლად ეჩვენებათ: წიგნი მაღალი რანგის აზროვნების (რაც თავისთავად მაღალმორალურიცაა), გამოყენებით გვთავაზობს ქართულ სინამდვილეში ქვეყნის ფეხზე წამოყენებას, სიცოცხლისუნარიანი, განვითარებადი სახელმწიფოს შექმნის ტექნოლოგიას და მთავარ საწარმოო იარაღად ადამიანის ინტელექტს წარმოგვიჩენს, რომლის ტოლფასი სიმძლავრე ხილულ სამყაროში, (ღვთის გარდა) ჯერ არ არის ცნობილი. ნაშრომში გახსნილია ადამიანში ჩადებული უდიდესი ფასეულობის, უმძლავრესი პოტენციალის ქვეყნის სასიკეთოდ ამოქმედების მექანიზმი.